Ամպի երեխաները

Ամպը չորս երեխա ունի: Չորսին էլ լավ ճանաչում եք:

Մեծը հաճախ է գալիս, խփում տանիքներին, աղմկում տանիքների վրա: Երբեմն էլ կարծես գժվում է՝ թափվում է ու թափվում, գետերն է լցվում, դրանք էլ հորդանում են, ափերից դուրս գալիս, ծածկում ամեն բան:

Նա վատը չէ, ընդհակառակը՝ այնպե՜ս է ծառ ու ծաղիկ սիրում, իջնում է, զովացնում ծարավ կանաչներին, ջուր տալիս չորացած հողին:

Նրա քույրը ճերմակ աղջիկ է: Ցրտերը վրա հասնելուն պես փռում է իր փափուկ վերմակը մերկ անտառների ու դաշտերի վրա, որ փոքրիկ սերմերը չմրսեն հողի տակ:

​Բայց ի՜նչ չար է սրանց եղբայրը: Գալիս է քամու հետ, որն իր նման խենթ է, փշրում է ծառ ու ճյուղ, փչացնում արտ ու խոտ՝ իբր թե կատակ է անում: 

​Բոլորից փոքրը պստիկ, քնքուշ աղջիկ է: Գարնան գիշերներին մարգարիտներ է շարում ծաղիկների ու խոտերի թերթերին: Ձմռան ցրտին նա մեր պատուհանների ապակիներին իր պաղ մատիկներով գեղեցիկ նախշեր է գծում:

​Ահա ամպի չորս երեխաները՝ Անձրևը, Ձյունը, Կարկուտը և Ցողիկը:

​Ասացի չէ՞, որ չորսին էլ լավ եք ճանաչում:

Հարցեր և առաջադրանքներ

1.Ամպի ո՞ր երեխան է.

տանիքների վրա աղմկում —

ապակիների վրա նկարում —                               

ծառ ու ճյուղ փշրում — ​

պաշտպանում փոքրիկ սերմերին —

​2. Դու ո՞ւմ կնմանեցնես Ցողիկին, Անձրևին, Ձյանը, Կարկուտին:

Իմ կարծիքով Ցողիկը նման է 

Անձրևը

Ձյունը 

Կարկուտը 

3. Նկարի՛ր ամպի որդիներին և պատմի՛ր նրանց մասին:

4. Իսկ դու նրանցից ո՞ւմ ես նման:

5. Հորինի՛ր. Արևի երեխաները